Үжүглелим, байырлыг!
Бо чылын 1-ги классты доозуп, тыва дылын шиңгээдип, өөренген Тывавыстың чаштарынга ам-даа чедиишкиннерни күзедим. Төрээн дылын алдаржыдар, аңаа камныг болгаш ынак болурунче кыйгырыгны шупту чаштарга, аныяктарывыска, кырган-ава, кырган-ачалар апарып турар салгал-аймактарга салыр-дыр мен.
Үжүглелим, байырлыг!
Үжен алды үжүктерлиг,
Үжүглелим – тускай номум.
Бирги класска киреримге,
Барбам ээзи болган номум.
Тыва дылым үнген дөзү,
Тывызыксыг эртиневис.
Берге үннер адап тургаш,
Баштай сенден өөренген мен.
Авам, ачам – салгалдарым,
Үжүглелди холга туткан.
Салгал дамчып чедип келген,
Солун, ховар өңнүүвүс сен.
Ажык болгаш ажык эвес,
Адаттынгыр үннер ырлап,
Сөстен сөстү кожарын-даа,
Өөреткен үжүглелим.
Төрээн тывам каас-байлаан,
Төөгүзүн алгап-йөрээн,
Кайгамчыктыг үжүглелим
Каптагайга алдаржызын!
Ольга САРЫГЛАР.
Кызылдың дугаары ийи школазының дээди категориязының эге класс башкызы.
Авторнуң чуруу
