Өөредилге чылынга чедир каш-ла хонук арткан
Уруглар!
Өөредилге чылынга чедир каш-ла хонук арткан. Чаптанчыг шүлүктерни номчуп, школага белеткенип, эгелээирңерни сүмеледивис.
Сайзанак
Чалым-хая баарында
Салбак чаштыг бичии уруг
Чаактары кыза берген
Сайзанактап ойнап олур.
Дээрдиве бедип ушкан
Дээлдиген талыгырда
Демги кысты чаптаан ышкаш,
Дескинип харап турду.
Сайзанактаан чараш кысты
Сайда хонган сайгадак куш
Сайтыладыр ырлавышаан,
Чаптап көрүп орган дег-дир.
Ховаганнар
Айыраң каас чечектерниң
Аалчызы – ховаганнар,
Аажы-чаңы оожум, топтуг,
Аажок чараш ховаганнар.
Ушкан, хонган ховаганны
Уруг чаштар тудуксаарлар.
Ынчалза-даа оларлары
Ындыг амыр туттурбастар.
Чүктеп алган чалгыннары
Чүзүн-баазын чайырларлыг.
Ак, көк, кызыл, кара өңнер
Артында-ла алдынналчак.
Сайлык Сагаан
Сайлык Сагаан
