Материал 413

Республикага «Демография» национал төлевилелди боттандырар сорулга-биле уруглар садтарынга немелде тудугларны кылып, ажыглалче киирип турар. Ол дээрге 1 хардан 3 харга чедир 30 уругга, ясель бөлүктер болур. ТР-ниң Өөредилге яамызының парлалга албанының дыңнатканы-биле Кызыл хоорайда № 7, 11, 38 уруглар садтарында, Хову-Аксында, Хандагайтыда болгаш Шагаан-Арыг хоорайда – 2, Самагалдайда – 2, 9 немелде тудуглар ажыглалче кирген. Ажыглалче кирериниң чөпшээрелин Сесерлигниң болгаш Кызылдың №28 – 2 уруглар сады манап турар. Хоорайда № 30, 36, 39 болгаш Ыраккы Каа-Хемде «Малышок», Эрзинде – 5 уруглар садтарының тудуглары арткан. Ыраккы Каа-Хемде «Малышок» уруглар садында немелде тудугну долгандыр чаагайжыдылгазы бар. Тудугны кылып турган бирги организация хүлээлгелерин багай күүседип турганы-биле аразында керээни үскен. Катап чаа күрүне керээзин «СК Изумрутный город» КХН-биле чарган. Чаа организация ажылын кылып кирипкен, амгы үеде херим иштиниң шөлдеринде ойнаар херекселдерни тургузуп турар. Кызылдың дугаары 17 уруглар садында немелде тудугнуң одалгазын кожупкан, изиг-соок суг дамчыдылгазын бериптерге, Росхереглелхайгааралдың чөпшээрелин алыры артар. Ук уруглар сады чаа немелде тудугга бичии уругларны хүлээп алырынга амдыгааштан белеткенип эгелей берген. 39 дугаар уруглар садының немелде тудуу 100 хуу белен, чүгле Росхереглелхайгааралдың болгаш күрүнеөртхайгаарал чериниң чөпшээрел бижиин алыр. Оон аңгыда долгандыр асфальдылаар ажылды ГКУ РТ «Госстройзаказ» чорудуп турар. «Демография» национал төлевилелдиң ачызында немелде ясель бөлүктеринче 270 уруг чоруп турар. Удавас 210 уруг садче баар аргалыг болур. Аңаа дүүштүр ажылчын олуттар база немежири билдингир. #Демография #ДетскиеСады #Дети #ВопросДня #Тыва #Сылдысчыгаш_солуну