Ада-иезиниң мини аас-кежии
Өг-бүлениң дун уруу — аныяк ада-иеге аас-кежик болбас арга чок. Ава, ачаның хүлээлгезин күүседир улуг харыысалга, сагыш човаашкын оларга немежир. А бичии чаш долгандыр делегейни сонуургап, быжыг кадыкшылдыг өзүп-доругары артар. Бо удаада "Сылдысчыгаштың" аалчызы ада-иезиниң мини аас-кежии дээрзин бичии номчукчуларывыс билип каан боор.
Аэлина Иргит 2017 чылда төрүттүнген, ол ам 6 харлыг. Хемчик суурда уруглар сады барып турар. Бирги классче кирер дээш белеткенип эгелээн: садикке-ле номчуп, бижип билир апарган.
Аэлина — амдыызында ава-ачазы Челээш Иргит биле Менди Салчактың чаңгыс уруу. Ачазы — өрт өжүрүкчүзү, биче сержант. А авазы Красноярск хоорайга эмчи университедин дооскан, косметолог-эстетист болуп ажылдап чоруур.
Аэлина шимченгир, чүвеге өөрениичел, агаарлаарынга ынак. Алды харлыг хирезинде, ол бодунуң күзелдеринче бичии базымнар-биле чоокшулап олурар.
Төрелдериниң аразында Мини-Мисс деп аттыг. Чүге дизе чажындан тура-ла, янзы-бүрү мөөрейлерге киржиринге ынак. Моделингти аажок сонуургаар, бичии-ле арга тургустунза, мөөрейлерге киржир күзелдиг. Ооң бир чедиишкиннериниң бирээзи — Мода неделязынга киришкени. Ол подиумга көрүкчүлер мурнунга бүзүрелдиг кылаштап, хептерни чараштыр көргүскен.
Ол хостуг үезинде спортка хандыкшып, танцы бөлгүмүнче барып турар. Бичии эштери-биле чадаг-терге мунуп алгаш халдырлар. Садиктиң спортчу хемчеглериниң база-ла идепкейлиг киржикчизи.
Аэлинаның ада-иези уруун чажындан-на спортчу, идепкейжи кылдыр кижизиткен. Ындыг болбас арга чок, ооң ачазы бут бөмбүү команданың кежигүнү. Каяа-даа маргылдааларга киржир. А авазы школачы чылдарында чараш болурунуң мөөрейлеринге киржип чораан. Ол чаңчыл уруунда дамчып келгени чадавас.
Мира КОНГУЛ-ООЛ белеткээн
