Айхээ Көшкендей: “Кажан долгандыр чараш чүүлдер бүргеп турда, кижи ала-чайгаар чараш болур”

Бөгүн чараш чүүл дугайында чугаалажыр бис, уруглар. Ындыг болганда бичии чараш даңгына, салым-чаяанныг кыс база ада-иезиниң чоргааралы ­— Айхээ-биле чугаалажыр бис. Ооң ады безин тускай. Айның угулзазы дээн уткалыг. Долузу-биле ону Айхээ Айгор-кызы Көшкендей дээр. Ол — Кызылдың 1 дугаар школазының 2-ги класс­чызы, "Салгал" чогаадыкчы төптче барып турар. Айхээ — Тывада база бир салым-чаяанныг чогаадыкчы өг-бүлениң, Айдысмаа биле Игорь Көшкендейлерниң, уйнуу. - Айхээ, өг-бүлеңни таныштырып көрем. - Мээң өг-бүлем - улуг, найыралдыг. Ачамны Айгор Игорь-оглу Көшкендей дээр, авам — Белекмаа Андреевна Көшкендей. Ынак дуңмаларым бар: Танаа-Херел биле Монкуштей. Авам, ачам — башкылар. Ачам — информатика башкызы, а авам — даштыкы дыл башкызы. Танаа-Херел 5 харлыг, а Монкуштей 2 харлыг. - Айхээ, хоббиң дугайында чугаалап көрем? - Танцылаарынга ынак мен, оон ыңай вокалга. Танцылаары — чараш, а ырлаары — оон-даа артык чараш. - А чүге танцыга ынак сен? - Чараш танцы-биле гастрольдар чоруур, чараш хоорайларны, черлерни көөр. Дыка солун ышкажыл. - Хөгжүм сеңээ чүнү берип турарыл? - Ыры мээң сагыш-сеткилимни илередиринге дузалаар. Чамдыкта муңгарай бээримге, хөгжүм меңээ эки хөөн киирер. - Школада кандыг кичээлге ынак сен? - Литературлуг номчулга кичээлинге ынак мен. Хөй номчуурга, хөйнү билип алыр. - Амгы үеде кандыг ном номчуп тур сен? - «Бременские музыканты” деп номну номчуп тур мен, мультфильми база солун. Чүге дизе ында кол маадырлар — хөг­жүмчүлер. - Хостуг үеңде чүнү кылырынга ынак сен? - Хостуг үемде дуңмаларым-биле ойнаарынга ынак мен. - Айхээ, чараш деп чүл? - Чаражы дээрге-ле ол — кижи боду. Кажан кижини долгандыр шупту чүве чараш болза, ынчан ала-чайгаар чараш апаар сен. - Эр хей, дыка чараш сөстер-биле харыыладың. А ынак чечээң бар бе? - Роза. - Чүге розага ынак болганың ол? - Чүге дизе розаның чыды чаагай. - "Сылдысчыгаш" солуннуң редакциязынга харылзажып, айтырыгларга харыылааның дээш четтирдивис, Айхээ, моон-даа соңгаар чогаадыкчы чедииш­киннерлиг болуруңну күзедивис. - Улуу-биле четтирдим. Мира КОНГУЛ-ООЛ очулдурган