«Артекке» дыштанганым

Кызылдың немелде өөредилге төвүнде «Журналистика» бөлгүмүнүң башкызы Ирина Владимировна Белкина-биле бир катап журналисчи мөөрейни көрүп каан бис. Ооң шаңналы – «Артек» Бүгү-делегейниң уруглар төвүнге дыштаныр путёвка. Ынчан, чаа-ла 13 харлыг тургаш, «Артек» лагеринге дыка-ла дыштаныксаан мен. Ынчангаш ук шаңналды чаалап алыр сорулганы салган мен. Мөөрей 2 чадалыг турган: «Келир үениң медээзи» чагаа-эссени бижиир база видеороликти белеткээр. Херек чүүлдерни чорудупкаш, мөөрей дугайында уттупкан мен. Бир хүн тиилекчилерни чарлапканын көрүп калдым. Муң-муң уруглар аразындан чүгле 100 кижи тиилээн. Оларның аразында мээң адым база бар! Өөрээнимден өрү шурап турдум! Самолётка олурупкаш, Москвага четкеним уттундурбас. Шупту чүүлдер солун болган. Ооң соонда уруглар-биле кады «Артекче» үнүпкен бис. Ынчан бистерни «Аврора» компания үдеп чораан. Бот-боттарывыстан чыдып калбазын дээш көк өңнүг футболкаларны үлеп берген. Орукка уруглар-биле таныжып ап, дыка хөй эштерлиг апарган мен. Лагерьге келиривиске, назы-хар аайы-биле отрядтарга чарып каан. Мен чаа таныжып алган эжим Тая-биле бирги отрядка таварышкан мен. «Артекке» дыштанып турган үелеримни сактырга, дыка солун. Хостуг үелеривисте агаарлап, ойнап, эштип дээш черле анаа олурар үе чок. Янзы-бүрү экскурсиялар, танцы-сам, мөөрейлер, хемчеглер черле үзүктелбес. А чеминиң чаагайын чүүге-даа деңнеп четпес. Ында эң-не чаагай чемни кылып турар. 3 неделя дургузунда эштеривис-биле чаңгыс өг-бүлениң уруглары ышкаш чоок апарган бис. Дыштанылга соонда тарап чанары – эң-не муңгаргай үе. Чамдыктарывыс ыглажып-даа турган. Бис эштеривис-биле куспактажып, омак-хөглүг дыштанылгавысты кажан-даа утпазын даңгырагладывыс. Долума ООРЖАК. Кызыл хоорай. Долума Ооржактың хууда чуруктары #Артек100 #артековцы_тыва Министерство образования Республики Тыва