Ава
Ажы-төлдүң чүрээн чылдыр
Ава дээрге Хүн дег чаңгыс.
Хүннүң изиг херелинден
Күжүр ие холу чылыг.
Авыралдыг ава кижи:
«Кызым-оглум канчап чор?» - деп,
Кыржың соокта, ышкам хүндүс
Ажаанзырап човаан орар.
Амыдырал мөңгези дег,
Аваларга назы турбас.
Кедээр сында шиви пөш дег,
Кезээ шагда чалыы, чараш.
Бүгү күжүн авазы дээш,
Бүрүн четче үндүрзе-даа,
Чаңгыс дүне ажааганын
Чандырыпкан ындыг төл чок.
Александр Даржай
Буян Ооржактын тырттырган чуруу
