Балгазын суурнуң школазындан бичии казактар Бердск хоорайда шериг-патриотчу маргылдааларда киржип турар

Бо хүннерде Новосибирск облазының Бердск хоорайында Россияның шупту булуңнарындан казак кадет класстарның төлээлери чыылганын Республиканың немелде өөредилге хөгжүлдезиниң төвү дыңнаткан. Чурттуң чеди аңгы регионундан казак кадет класстарның командалары боттарының хей-аъдының бедиин, күчү-күжүн база өгбелериниң езу-чаңчылдарынга бердингенин, уран-талантызын көргүзерлер. Тываны Балгазын школазында казак класстың алдыгы классчылары төлээлээр. Оларның удуртукчузу - Елена Манеева. Олар боттарының төрээн чуртунуң адын камгалап, чүгле күш-шыдал талазы-биле эвес, а төрээн чериниң төөгүзүнүң дугайында айтырыгларга харыылавышаан, хөгжүмнүг мөөрейге база боо-чепсекти кайы хире ажыглап билирин көргүзерлер. 💬«Бистиң бичии казактарывыс бедик көргүзүглерлиг, көрүкчүлер болгаш жюри кежигүннеринге боттарының билир чүүлдерин бараалгадырынга белен. Оолдар, уругларывыстың тиилелгеге бүзүрелин оттуруп, чылыг-чымчак сөстер-биле деткиилиңер» - деп, Кызыл кожууннуң чагыргазының даргазы, Үстүү-Енисейск казак ниитилелиниң атаманы Евгений Овсянников чугаалаан.