Башкы мергежилин шилип алганымга өөрүүр мен

Эргим уруглар! Мен база силер ышкаш школага өөренип, ынак башкыларымның чагыг-сүмезин дыңнап, сагылга-чурумнуг, эки өөредилгелиг болуп өзүп келген мен. Бо хүннерде бистиң чуртувуста база бир чырыткылыг, чараш байырлалдың бирээзи – Башкының хүнүн демдеглээринге белеткенип, янзы-бүрү хемчеглер, акциялар, челленджтер эртип турар. Ынчангаш мен база #мээң_ынак_башкым челленджке каттыжып, 2001 чылда бисти доостурган клазывыс башкызы Мария Николаевна Донгакка байырымны чедирип тур мен. Мария Николаевна дыка кижизиг, биче сеткилдиг, дузааргак башкы чүве. Бистиң клазывысты хаара тудуп, арга-сүмезин берип турган. Башкывыстың ачызында шупту эртем-билигни чедип ап, амыдыралдың улуг оруунче үнүп, багай эвес ажылдап-чурттап чоруур бис. Ынчангаш башкывыска четтиргенимни илередип, чараш байырлалы таварыштыр ажыл-ижинге хөй-хөй чедиишкиннерни, өөрүшкүнү, быжыг кадыкшылды күзеп тур мен! Амгы үеде клазым башкызы Мария Николаевна Донгак-биле кады чаңгыс школада башкы болуп ажылдап чоруур мен. Мээң башкы мергежилин шилип алганымга башкымның киирген үлүг-хуузу улуг. Ол дээш база катап черге чедир мөгейдим, Мария Николаевна! Хүндүткел-биле Чодураа ТАРТАН-ООЛ. Кызылдың 9 дугаар гимназиязының башкызы #челлендж #моя_любимая_учительница