Буян-Бадыргы Монгуш — шыдыраачы
Чаа-Хөл школазының үшкү классчызы Буян-Бадыргы Монгуш салым-чаяанныг шыдыраачы болуп өзүп олурар. Ол спорттуң бо хевирин бичиизинде-ле сонуургап эгелээн. «Сылдысчыгаш» солуннуң корреспондентизи Буян-Бадыргы Монгуш-биле чугаалажып, кыска интервьюну белеткээн.
- Бодуң дугайында таныштырып көрем.
- Школада өөренип турар эртемнерим аразындан сан кичээлинге ынак мен. Бодалгаларны бодап, санап, аңгы-аңгы математиктиг бодалгаларны шиитпирлээри дыка солун.
- Шыдыраа талазында кайы хире үр апардың?
- Шыдырааны бирги класска тургаш-ла, сонуургап эгеледим. Баштай анаа ойнап чоруп тургаш, ооң соонда улаштыр ойнаар деп бодап алдым. Шыдыраага ойнаары солун-даа, берге-даа. Аңаа стратегтиг угаан-бодал, шыдамыккай чорук, удурланыкчызының базымнарын баш бурунгаар даап бодаары негеттинер. Хүннүң-не кичээлдер соонда, шыдыраа бөлгүмү барып турар мен. Чамдыкта улуг улус-биле-даа ойнагылаар, оюн санында чаа билиглерни ап турар мен.
- Маргылдааларга киржиринге ынак сен бе?
- Элээн хөй маргылдааларның тиилекчизи болгулаан мен, чоокта чаа Шагаа байырлалынга тураскааткан кожуун чергелиг маргылдаага 10 хар чедир оолдар аразынга база бирги черни алдым. Бо тиилелге меңээ спорттуң шыдыраа адырынга чугула чада болуп, күш-ажылгыр чорук чедиишкинниг болур дээрзин бадыткаан. Чаа турнир бүрүзү бодунуң мергежилин сайзырадыр, чаа ойнакчылар-биле ужуражыр, дуржулга солчур база бир-ле чаа чүүлдү билип алыр арга болур. Шыдыраа оюну мени удурланыкчызын хүндүлээр, аштырыышкынын төлептиг хүлээп алыр кылдыр өөреткен. Келир үеде моон-даа соңгаар өөредилгеге-даа, шыдыраа спортунга-даа бодумнуң салым-чаяанымны сайзырадып, чедиишкиннерлиг болурумга идегээр мен.
- Өзүп келгеш кым болур сен, мергежил шилип алдың бе?
- Банкир болур күзелим бар. Бистиң төрел-аймаавыста банкир болган кижи – мээң даайым. Ол — шыдаар кижи. Банкир мергежилге сан, орус дыл, экономика база даштыкы дылды эки билири негеттинер. Бо эртемнерни эки сайгарып өөрениксээр мен. Чижээлээрге, даштыкы дылды эки билири өске чурттарга ажыл-херекти чогудуп, өске чурттарның хамаатылары-биле чугаалажырынга ажыктыг. Ниитизи-биле алырга, делегейде болуп турар чүүлдерни шуптузун билип алырынга дузалыг. Банк ажылдакчызы оон ыңай бүгү талазы-биле сайзыралдыг болуру чугула. Бо мергежилди чедип алыр дээш кызыдар мен.
- Өг-бүлең дугайында чугаалап көрем.
- Улуг угбам бар, менден бичии эр дуңмам бар. Шупту дыка найыралдыг бис. Ада-иевиске бажың ажылы кылырынга дузалажыр. Үжелээ ойнаар, оон шупту онаалга кылыр. Оон аңгыда кырган-ававыс, кырган-ачавыска инек кадарарынга, огород тарыырынга дузалажып турар бис.
Мира КОНГУЛ-ООЛ очулдурган.
Буян-Бадыргы МОНГУШТУҢ чуруктары
