Чайлагларда уругларның айыыл чок дыштанылгазы

Ак-Довурак хоорайның өөредилге эргелели база школаларның башкылары «Айыыл чок чай» акция езугаар профилактиг үнүүшкүннерни чоруткан. Чайгы үеде чайлагларда уругларның дыштанылгазын айыыл чок болдурары-биле, хем-сугга айыыл чок чорук, чаш уругларның кемдеп-берттинип болуру, малчын турлагларга аът-хөлден айыыл база ада-иениң уруг-дарыының айыыл чок чоруу дээш харыысалгазының дугайында сагындырыг-тайылбыр ажылы кылганнар. Чайлагларда уругларның айыыл чок чоруун хыналдага алыры-биле үнүүшкүннер чай дургузунда үргүлчүлээр. Назы четпээн уруг-дарыгның айыыл чок чоруу чүгле улуг улустан хамааржыр. Ынчангаш уругларның кадыкшылы, амы-тыны дээш харыысалгалыг болуп, бедик кичээнгейлиг болурун ада-иелерге база катап сагындыраал.