Чаштарга дузаламчы 5 муң рубль

Россияның Президентизи В.В. Путин Чаа чыл таварыштыр 8 хар четпээн уругларга чаңгыс удаа 5 муң рубльди дузаламчы кылдыр берген. Улуг байырлал мурнунда бичии ажы-төлдүг өг-бүлелерге улуг өөрүшкү болгаш белек болганы билдингир. Кызыл хоорайның чурттакчылары Саян, Айыраа Мелдер-оолдарның өг-бүлези 3 ажы-төлдүг. Улуг уруу Санджана – 7 харлыг, оон бичиизи Санчай – 3 харлыг, хеймери София – 6 айлыг. «Чаа чыл таварыштыр бичии чаштарлыг өг-бүлелерни чаңгыс удаа-даа болза деткээни езулуг улуг байырлал болган деп бодаар мен. Ылаңгыя, бо берге хамчыктыг аарыг үезинде. Ол акша-биле уругларывыска Чаа чылдың улуг чараш шивижигежин, янзы-бүрү ойнаарактарны, утренникке киржир маскарадтарны садып алдывыс. Уругларывыстың карактарында өөрүшкү чайнаан, чаптанчыгларын канчаар» - деп, өгнүң херээжен ээзи Айыраа чугаалаан. #Единовременныевыплаты #Дети #Дузаламчы_акшалар #Бичии_чаштарывыс #Тыванын_аныяктары #Сылдысчыгаш_солуну