Чедиишкинниң төөгүзү: олимпий оюннарының чемпионнары-биле ужуражылга

Россияның спортчулар эвилелиниң боттандырып турары «Олимпийжи легендалар – Россияның уругларынга болгаш аныяктарынга» бүгү Россия программазы езугаар мастер-классты ат-алдарлыг спортчулар, Олимпий оюннарының чемпионнары Хаджимурат Гацалов, Царгуш Денис база Хаджимурад Магомедов «Херел» спортзалынга эрттиргеннер. Ужуражылга үезинде спортчулар боттарының чедиишкининиң төөгүзүн уругларга чугаалап берип, бергелерге торулбайн, бурунгаар чүткүлдүг болурун чагып-сургаан. Оолдар Россияның ат-сураглыг спортчуларын улуг сонуургал-биле дыңнаан. Бичии мөгелер боттарының амдыызында улуг эвес-даа болза, спортчу чедиишкиннери-биле үлешкеннер. Олимпий чемпионнары-биле ужуражылга чылыг-чымчак, найыралдыг, спортчу байдалга эрткен. Спорттуң легендалары оолдарның холун тудуп, тураскаал кылдыр холунуң үжүүн арттырганнар. Алдарлыг спортчулар-биле кады чурукка тырттырганы бичии оолдарга уттундурбас болуп артар. #ЧР_вольнаяборьба_тыва Мира КОНГУЛ-ООЛ белеткээн. Б.Ооржактың тырттырган чуруктары.