КҮСКЕНИҢ ЧЫЛГА КИРГЕНИ

Теве биле Күске маргыжа берип-тир. Теве тура: — Мен эң улуг амытан мен, мен чылга кирер мен — дээн. Күске тура: — Мен эң биче амытан мен, мен чылга кирер мен — дээн. Теве тура: — Ындыг болза, хүн кайы чүктен үнүп келирил, ону мурнай көргенивис чылга кирзин — деп-тир. Күске тура: — Ындыг-дыр — деп чөпшээрешкен. Теве хүн үнер чүкче көргеш, чыдып алган. Күске тевениң мөгенинче үне халааш, соңгаар тайга бажынче көргеш, олуруп алган. Ынчап турда, үнген хүннүң, херели соңгу тайга бажынга дээп кээп-тир. — Хүннү мен мурнай көрүп кагдым! — деп, Күске алгыра-ла берген. Ынчангаш Теве ол орта аштырган. Күске чылга кирген чүве-дир. Теве чылда кирбээн-даа болза, «Он ийи чыл» теведе шупту бар дижир: Теве Күске-биле маргышкан; дуюу Инектии дег ийи адыр; бажы тейинде дүктүг Пар бажы хевирлиг; думчуу Тоол ай думчуу дег; упчу боду ыргак-аргак Улу хевирлиг; кудуруу Чылан ышкаш; караа Аъттыынга дөмей; дүгү Хойнуу ышкаш; мөгени Сарбашкын хевирлиг; кулаа Дагаа шинчилиг; алгызы ыттыынга дөмейзимээр азы Хаванныы ышкаш. #шагаа2021