МАКТАНЫКЧЫ
Бирги класста өөренип турар Витя аажок-ла мактаныкчы оол. Ол үргүлчү-ле: «Ону шыдаар мен, мону шыдаар мен» — деп чоруур.
Бир-ле катап бирги классчыларга цирк артизи келгеш айтырган:
— Кым цирк студиязынга дузалакчы болуксап турарыл, чээ?
— Аңаа чүнү кылыр чүвел? – деп, уруглар айтырган.
— Арзылаңнар, парлар, янзы-бүрү дириг амытаннар-биле ажылдаар —деп, ол харыылаан.
— Мен шыдаар мен — деп, Витя ам база мактанган.
— Парның аксынче бажың суп шыдаар сен бе? — деп, келген артист ылавылап айтырган.
— Шыдавайн канчаар, шыдаар мен — деп, ол дүште-даа чок харыылаан.
— Мындыг коргуш чок оолдар бистиң ажылывыска дыка-ла дузалыг-дыр ийин — дээш, цирк артизи дыка өөрээн.
Дугурушканын езугаар кежээ Витя циркке чедип келген.
Парлар-биле ойнаар көргүзүгнү чарлаптарга, аренаже үнүп келгеш, парларны көрүп кааш, Витя сириңейнип эгелээн. Ынчалза-даа дедирленир харык бар эвес, парның аксынче бажын киир сугардан башка, өске арга чок апарган. Ол караан шимгеш, парның аксынче бажын суп-ла дүжүрген. Хамык көрүкчүлер: «Аа-аа, ии-и!» — деп алгыржыпкаш, көжүй берген органнар.
Пар Витяны ажырыпкан. Ооң хырны дыка караңгы болган. Коргуп, девидеп олурда, хенертен чырыш-ла дээн. «Школа баар үең келди, оглум» — деп, авазы бо оттуруп турган. Ол олчаан Витяның мактаныр чоруу читкен.
Диана Оюн.
(«Сылдысчыгаш» солуннуң 2006 чылда үндүргени „Авыс чайлааның азалары” деп номдан).
