Мээң школам чараш

«Сылдысчыгаш» солуннуң редакциязы Кызылдыӊ 2 дугаар школазыныӊ 1 «д», 1 «а» клазыныӊ өөреникчилери-биле ужу­раш­кан. Бирги классчылар школазыныӊ ду­га­йында мынчаар чугаалаан. Түмен Моӊгуш, бирги классчы: - Мээӊ школам эки. Бо дээрге Тываныӊ эӊ-не баш­тайгы школазы-дыр. Ону 1927 чылда кылган. Улуг чогаал­чы Моӊгуш Кенин-Лопсан маӊаа өөренип турган. Алина Ооржак: - Мээӊ школам - дыка улуг. Чараш чечектер база бар. Школага үжүктерни, сан­­­нарны өөренип алыр мен. Улуг башкы Арыя Арап­та­нов­на Алдын-оол ма­ӊаа ды­ка хөй оолдарны, уруг­­ларны өөредип турган. Сүлдем Ондар: - Школага өөренирге эки. Баш­кым солун чүүлдерни чугаалап берген. Бо школага угаанныг, чурумнуг, ажылгыр кежээ оолдар, уруглар өөренип турган. Оон эртемден апарган. Билчир Данил: - Школам улуг болгаш чараш. Өөренирге солун. Сан кичээлин сонуургаар мен. Мээӊ школамны академик Юрий Аранчын 1947 чылда дооскан. Оон Санкт-Петербург (Ленинград) хоорайда институтка өөренип турган. Ника Сат: - Школамга ынак мен. Шко­лавысты Арыя Алдын-оол деп улуг башкыныӊ ады-биле адаан. Маӊаа Совет Эвилелиниӊ Улустуӊ башкызы дыка хөй ки­жи­лерни өөредип турган деп, башкым Моӊгуш Айсуу Шулууевна чугаалап берди. Тыва дылды бичиилерге өөреткен Дыӊнап ханмас, хоюг үннүг башкывыстыӊ Ады-биле адын адааш, чаартып кылган Арыг-делгем школамга өөренир мен. Рада Демчик, Буян Ооржак чуруктарны тырттырган.