Санкт-Петербургта тыва землячествонуң «Полк уруу»
Санкт-Петербург хоорайда тыва землячесто чаңгыс чер чурттугларының ортузунда янзы-бүрү хемчеглерни эрттирип турар. «Аныяк Тыва» Санкт-Петербургтуң тыва землячествозунуң регионалдыг хөй-ниити организациязы июль 28-те тургустунганындан бээр 15 чыл болур. Ооң тургузукчузу болгаш даргазы Алла Знаменская 24 чыл дургузунда ук хоорайда чурттап, 2 ажы-төлүн азырап чоруур. Улуг оглу 19 харлыг, бичии уруу 5 харлыг.
Алла Знаменскаяның хеймер уруу төрүттүнгеш, 2 неделя безин четпээнде, авазы эдертип алгаш, янзы-бүрү хемчеглерге киржип эгелээн. Ынчангаш активтиң кежигүннери Марьямны «полктуң уруу» азы «эң-не кол активчи» деп баштактанып адаарлар. Чоокта чаа Алла Знаменская уруу Марьям-биле «Ачам, авам, мен – спортчу өг-бүле бис» чыынды команданың кежигүннери кылдыр киришкеннер.
Бичии Марьям 3 харлыындан тура Мария Монтессориниң методу езугаар ажылдап турар хууда садикче барып турар. Оон аңгыда ол —Санкт-Петербург хоорайның Невск районунуң 43 дугаар уруглар садының кижизиттирикчизи. Марьям хостуг үезинде янзы-бүрү угланыышкынныг бөлгүмнерже барып турар: «Art Vision» модель школазы, улаштыр «Я – актер» театр студиязы, «Егоза» танцы бөлгүмү дээш оон-даа өске.
Авазының шиитпири-биле 5 харлыындан тура бөлгүмнерни спортче угландырган. «Комета» уругларның спортчу школазының спортчу гимнастика бөлгүмүнче барып, «Невская волна» төпте неделяда 2 катап эштип турар.
Марьям бажыңга авазынга дузалажырынга ынак. Эң ылаңгыя манчы-бууза, далган быжырарынга идепкейлии-биле дузалажыр. Ынчалза-даа эң ынак чимизи яблоко, яблок чокта, чаңгыс хүн-даа шыдавас.
Блогерлер аразындар Блиппи, Катя база Максты көөр. Марьям чуруурунга болгаш саазыннардан дүрзүлер кылырынга ынак. Хостуг үезинде кандыг-бир чурукту азы саазыннардан дүрзүлерни кыла каапкан болур. Ол ышкаш танцылаар, ырлаар.
Үш чыл бурунгаар «кым болур сен» деп айтырарга, өрт өжүрүкчүзү азы камгалакчы болур мен деп харыылаар турган. Ооң соонда актриса, ынчалза-даа блогер болур күзелдиг. Ынчангаш блоггингче кирер эптиг үени манап турар.
Амгы үеде Марьям Тывада, авазының төрелдеринде, дыштанып келген. Алла Знаменская чоокку үеде Москваже көшкен. Авазы чаа хоорайга ажылга тургустунуп алгыжеге, Марьям төрелдеринге дыштаныр.
«Тывада даайым, күүйүм, акыларым, угбаларым база кырган-ава, кырган-ачамның чанында мен. Угбам-биле кады самолётка ужуп келдивис. Тывада дыка эки-дир, авам база келген болза эки турган. Маңаа турарга, дораан-на кудумчуже үнүп келир, төрелдер база хөй, оозу эки-дир» — деп, чайгы дыштанылгазын Марьям таныштырган. Марьямны бир дугаар Тывага 6 айлыг турда, авазы эккелген. Ооң соонда 4 чыл эрткенде, а эрткен чылын авазы-биле төрээн чуртунга дыштанганнар. Питержи бичии уругга Бажың-Алаак суурда кырган-авазының бажыңында анай-хураганнар-даа, инек, аът-даа сонуурганчыг. Эрткен чылын Марьям авазы-биле Тываның онзагай бойдус-чурумалдыг, онзагай черлеринге четкен: Төре-Хөл, Дус-Хөл, Хадың, Үстүү-Хүрээ, Шагаан-Арыгда оваа база Бажың-Алаак суурда чаа оваа, «Сесерлиг» дыштанылга чери, «Ө, Ң, Ү» деп тыва үжүктер тураскаалы, «Кежеге» ыдыктыг чер, Национал музей, Даш хоорай, Будда бурганы, «Тубтен Шедруб Линг» чаа хүрээ.
Марьямның уруглар садында болгаш чурттап турар черинде эштери хөй, оон аңгыда ол Питерде чаңгыс чер чурттугларының уруг-дарыы-биле найыралдыг. Олар тыва землячествонуң хемчеглеринде бо-ла ужуражырлар. Шагаа байырлалында ол тыва дыл кырынга шүлүктү шээжи-биле чугаалаан. Марьямга бичии Лена дугайында чараш шүлүктү күүйү өөредип каан. Кырган-авазы, кырган -ачазы-биле чугаалажырда, эптиг кылдыр бичии Марьям тыва дылды өөренип алыксап турар. Авазы Марьямга төрээн дылын өөредир болган. Амдыызында Марьям «чаа, чаражын, чаптанчыын, ийе, чок, бээр келем» деп сөстерни билир. А чамдык домактарны саат чокка чугаалаар.
