Шагааның Ак айы: эки кылган чүулдер улуг күчү-күштүг болуп, оларны кылып турар кижиниң бодунга хөй катап эглип келир

Шагаа таварыштыр эрткен хемчеглерниң иштинде 5 «б» класстың өөреникчилери школаның музейинде Манзы-Шири Эртем Бурганынга тейлеп, келир үеде чырык угаан-медерелдиң, билиглерниң оруунче күзелдери боттанырын бодап алганнар. Музейде салдынган херекселдер, бурганнар, номнар дугайында Валентина Өдурековна Дөмүр-оол уругларга солун тайылбырны кылган. 💬«Тыва өгнүң эдилелдери-биле таныштывыс. Уруглар өгге хамаарышкан эт-херекселдерниң аттарын шиңгээдип алганнар. Ол ышкаш музейде бурганны аажок сонуургааннар. Бөгүн ай санаашкыны-биле Чаа чылдың бирги хүнү үнүп келген. Ооң-биле кады Шагааның Ак айы эгелээн. Шагааның Ак айында хүрээлерге барып, Бурганнарга тейлээр үе. Ак айның бирги он беш хонуунда йөрээлдер, эки кылган чүүлдер улуг күчү-күштүг болуп, оларны кылып турар кижиниң бодунга хөй катап эглип келир. Ак айда шупту улус бот-боттарынга чүгле экини, аас-кежикти болгаш кадыкшылды күзеп, чолукшуур ёзулалды кылыры-биле төрелдеринче аалдаар» - деп, 5 «б» класстың тыва дыл болгаш чогаал эртеминиң башкызы Сара Донгаковна Санчы тайылбырлаан. Ол ышкаш 5 «б» класстың өөреникчизи Чоргаар Саая «Тыва улустуң оюннары» төлевилелдиң Vреспублика чергелиг эрткен маргылдааның «Буга-шыдыраа» деп оюнунга ийиги черге төлептиг болганын сагындыраал. «Элээди журналист» бөлгүмү