Солуннуң 80 хары
Экии, эргим «Сылдысчыгаш»!
80 чыл болган юбилейиңер-биле өг-бүлевис база Кызыл кожууннуң«Эврика» уругларның немелде өөредилге төвүнүң мурнундан изиг байыр чедирдим.
Хоочун журналист, 81 харлыг угбаңар Светлана Данзын-оол-дыр мен. «Сылдысчыгаш» 1945 чылдың март айда тургустунган болза, мен 1944 чылдың март айда төрүттүнген мен. Барык чажыт эргим ынак солунум, солуннуң чараш чуруктарын көрүп, чоорту номчуп чораан ынак солунум, ооң ачызында тыва журналистикага 55 чыл бараан болганымга чоргаарланыр мен.
2006 чылда Кызыл кожууннуң немелде өөредилге төвүнге «Аныяк журналист» деп бөлгүм ажыткаш, аңаа 2019 чылга чедир ажылдадым, ол үеде силерниң редакция-биле харылзаавыс быжыг турган, аңаа 75 харлыымга чедир ажылдадым. Редакторларның ачызында өөреникчилеримниң бижээн ажылдары «Сылдысчыгашка» үнүп турду. Үстүкү классчылар «Тываның аныяктары» солунга бижип, материалдары чырыкче үнүп турду. Ам олар улгаткан, оларның аразында Сукпак школазындан Дуу-Дарый Тюлюш фотокорреспондент болган, Москва хоорайда ажылдап чурттап чоруур. Ол-ла школадан Саглай Сарыглар 3 дугаар чыл Тываның телевидениезинде ажылдап турар, ол ышкаш Анай-Хаак Бадын-оол база бистин телевидениеде. Арбай Данзын-оол Москвага Чоннарның найыралы күрүнениң университединге 6 чыл телеоператор кылдыр ажылдааш, ам Москваның эртем-техниктиг библиотеказында видеофотокорреспондент болуп ажылдап чоруур.
Мындыг өөреникчилерниң саны көвей, ол болза «Сылдысчыгаш» солуннуң бижикчилери-дир.
Кырган-ава Светлана Данзын-оол,
хоочун журналист
