Стартинейджер уругларны хаара туткан

«Башкы болгаш дагдыныкчы чылынга» тураскаадып, 1995-2011 чылдарда ол үениң «Стартинейджер» танцы-сам мөөрейин Кызыл кожуунга болгаш республикага нептередип, школачыларны болгаш аныяктарны танцы-самче хаара тудуп чораан салым-чаяан­ныг хореограф башкы Альберт Бурбужуктуң чырык адынга тураскаадып, Элегес-Аксы суурнуң көдээ культура бажыңынга Кызыл кожууннуң сумулар аразынга «Стартинейджер: перезагрузка-2023» бедик деңнелге болуп эрткен. Ук мөөрейни Альберт Бурбужуктуң дуңмазы база өөреникчизи Сайдаш Монгуш билдилии-биле удуртуп, өзүп орар салгалды боттарының кыптыгып чоруур салым-чаяанын боттандырып сайзырадырынга кыйгырыг-дуза кылдыр организастап эрттиргени кайгамчык болган. Альберт Бурбужук кайгамчык салым-чаяан­ныг танцы-самчы, чурукчу, шүлүкчү чораан. Ооң шүлүктери болгаш чуруктары «Сылдысчыгаш» солунунга үнүп турган. Хореограф-башкы ажылдап чораан Шамбалыг болгаш Элегес-Аксы школаларының өөреникчилери-биле 5 удаа Гран-при шаңналынга төлептиг болуп, башкының ажылынга бердингенин, оларның тиилелгеже чүткүлүн көргүскен. Моон алгаш көөрге, төөгү катаптаттынып турар, чүл дээрге Элегес-Аксының «Фурор» танцы бөлүү, удуртукчузу Долаа­на Ооржак «Байкеры» деп танцызы дээш Гран-при шаңналынга төлептиг болганнар, а Шамбалыгның «Челээш» танцы бөлүү, удуртукчузу Луиза Кенден 1-ги чаданың Лауреады деп атты чаалап алганнар. Клуб сыңмас көрүкчүлер «Танцор Алик башкы дээрде көрүп олурары ол-дур» деп баштактанып органнар. Төөгүде уттундурбас эң баштайгы «Стартинейджерниң» танцы-самчылары «Камон-брейкит» деп 1995 чылдың бөлүүнүң удуртукчузу Владимир Ооржак, солизи Саян Монгуш база аалдап келгеннер. Олар танцы-самын бараалгадыптарга, көрүкчүлер катап-катап сценаже чалап турганнар. Бурбүжүктерниң өг-бүлези. Чурукту Интернеттен алган. #год_наставника