"Сылдысчыгаш" солуннуң 80 харлаанынга
Эргим оолдар, уруглар!
2025 чылда бистиң республикавыста бичии чаштарның ынак солуну «Сылдысчыгаш» 80 харлаан. Солун-сеткүүл, ном номчуурунга ынак уруглар, оолдарга кожуун-сумуларның библиотека ажылдакчылары солуннуң ук-төөгүзүн таныштырып, солун хемчеглерни эрттирип турар.
Мен бүгү назыным иштинде бичии чаштар-биле сырый харылзаалыг ажылдап, башкылаашкын адырының хоочуну болганымда, «Сылдысчыгаш» солуннуң юбилейлиг чылында шупту оолдар, уругларга изиг байырымны чедирикседим. Солун өңгүр-чараш-тыр. Бичии уругларга таарышкан чуруктар, тоолдар бар.
Амгы чурагайлыг үеде бүгү чүве Интернет четкизи таварыштыр болуп турза-даа, уругларның солуну ам-даа чаштарның дугайында бижип, чырыкче үнүп турары өөрүнчүг-дүр. Совет чылдарда школаның башкылары, ада-иелер-даа уруг-дарыгга солун-сеткүүлдү чагыдып берип, номчулгаже аажок хаара тудар чүве болгай. Солуннарывыс эвээш-биче-даа болза, чырыкче үнүп, парлаттынып-ла турар болза, ажы-төлүвүстүң кижизидилге, өөредилгезинге ол-даа болза, дөгүмче болуру чугаажок. Оон аңгыда тыва дылда парлаттынып турар солуннар төрээн дылывысты камгалап арттырып алырынга улуг үлүг-хуузун киирип турар.
«Сылдысчыгаш» солун ам-даа хөй-хөй чылдарда уруг-дарыгны өөртүп, эртем, өөредилге, кижизидилгеге кол ролюн салбас-ла болзунам.
Уруглар солунунуң юбилейлиг чылы-биле, оолдар, уруглар!
Валерий КАРА-ООЛ,
хоочун башкы
