"Сылдыска" чагаа АВАМ, АЧАМ – БАШКЫЛАР Экии, өңнүктерим!
Авам, ачамның эң улуг уруу мен. Хөй ажы-төлдүг өг-бүлелер санынче кирип турар бис. Бодумдан бичии 3 дуңмам бар. «Сылдысчыгаш» солунунга ада-ием дугайында бижикседим. Авам биле ачам – башкылар. Авамны Алдынай Мергеновна Монгуш дээр. Ол – Мугур-Аксы суурунуң уруглар садында кижизидикчи башкы. Авам дыка угаанныг, дээди эртемин кызыл дипломнуг дооскан. Өскен-төрээн черинче чаш уругларга билиг бээр дээш ажылдап чедип келген. Ол алдын холдуг. Хостуг үезинде дааранырынга болгаш бажыңга ажыктыг, чараш чүүлдер кылырынга ынак. Биске кандыг-даа тыва хептерни даарап бээр. Шупту ону дөмейлештир кедип алгаш, чоргаарланып кылаштаар бис. А ачамны Айдың Каадыр-оолович Монгуш дээр. Ачам – тренер башкы. Бодум база ооң секциязынче барып, хүрежип өөренип турар мен. Маргылдаа бүрүзүнде ачамны эдерерин кызыдар мен. Чүге дээрге аңаа чаа-чаа аргалар көрүп, билип, өөренип алыр күзелим улуг. Бистиң бичии күрүневисте, өг-бүлевисте, бот-боттарывысты деткип, дузалажып чоруур бис. Авам, ачамга, дуңмаларымга дыка ынак мен.
Аңгырак МОНГУШ, Мугур-Аксы ортумак школазының 5 «б» клазының өөреникчизи. Чурукту өг-бүле хуу архивинден берген. #Сылдыскачагаа #Сылдысчыгаш_Солун
