Тайганың оглу

Шыяан ам Тайганың тайгазынга ивижи адашкылар чурттап чораан. Бичии Санаа чажындан тура ивилер кадарарып, ачазынга дузалажып, кончуг эрес-кежээ оол бооп өзүп келген. Бир-ле катап Санаа кежээки одарда ивилерин ончалап чорупкан. Арга ишти аяңда ивилери таваар оъттап чораан. Амырааш, ивилериниң чанынга чеде берген. Ол үеде хаак аразындан адыг көстүп келгенин Санаа эскерип каан. Оол корга берген, ынчалза-даа ачазының «Хенертен орукка бир аңга таваржы берзиңзе, чүгле дүвүреп болбас» деп чагыын сактып келген. Дүргени-биле чактыр боозун адарынга белеткей тудуп алган. Ол үеде адыг ийи бут кырынга туруп келгеш, удур оолче көрүп алгаш турган. Санаа чактыр боозу-биле адыгның ийи карааның ортузунче шыгаагаш, адарынга белен тургаш, адыгны коргудуп, кыдыынче адыптарга, адыг дезип ыңай болган. Санаа ивилерин ончалап чорааш, таварышкан таварылгазын ачазынга чугаалап берген. - Тайга оглу болган-дыр сен, оглум. Езулуг эр кижи кайы-хамаанчок тайга аңнарын адып болбас чоор. Сен бөгүн дидим, эрезиңни көргүстүң, оглум -деп, ачазы чугаалап-тыр. Аяна Бараан, Адыр-Кежиг суурда «Радуга» уруглар садының кижизидикчи башкызы.