Темирлан Монгуш – «Күзелдер шивизиниң» киржикчизи
Темирлан Монгуш — Кызыл хоорайның 3 дугаар школазының өөреникчизи. Ол — бүгү талазы-биле салым-чаяанныг, идепкейжи бичии оолак. Келир үеде космонавт болур күзелдиг. «Сылдысчыгаш» солуннуң корреспондентизи ооң-биле чугаалашкан.
- Бодуңну таныштырып көрем, Темирлан.
- Кызылдың 3 дугаар школазында өөренип турар мен. Сан, орус, англи дыл, делегей база саазын өртемчейи кичээлдери меңээ солун. Саазын өртемчейи кичээлинде янзы-бүрү дириг амытаннарны, чижээлээрге, койгун, ховаганны саазындан кылып турар бис. Өске кичээлдерни шиңгээдири меңээ чиик, чүгле дөрт-бештерлиг мен.
- Хостуг үеңде чүнү кылырынга ынак сен?
- Сонуургаар чүүлдерим-не хөй. Анимелер номчуурунга ынак мен. Чоокта чаа Наруто дугайында 3 улуг номну номчудум. Оон ыңай онзагай кижилер дугайында видеороликтер көөр, черлик амытаннар дугайында чаа-чаа чүүлдерни билип алыксаар мен. Компьютерге лабиринт хевирлиг оюннар ойнаар.
Хостуг үемде дзюдо секциязы барып турар мен. Акым батыр ышкаш спортчу болуп, хөй-хөй маргылдааларга тиилээр мен. Чамдыкта авамга база дузалажып турар мен. Дуңмамны карактаар. Ол дыка чаптанчыг.
- «Күзелдер шивизи» акцияга киришкениң дугайында «Сылдысчыгаштың» номчукчуларынга таныштырып көрем. Бо чылын күзелдериң кандыгыл?
- Эрткен чылын бо акцияга киришкеш, швед спортчу ханалыг болуксап турарымны бижээн мен. Чүге дизе акым-биле кады бажыңга күш-культура кылыр. Амгы үеде үргүлчү ону ажыглап тур бис. «Күзелдер шивизи» акцияга киришкеним дыка солун болган. Ол - уттундурбас сактыышкын. Бо чылын Чаа чылда Соок-Ирейден бокстуң спортчу грушазын дилээн мен.
- Кышка ынак сен бе?
- Кыш – чылдың эң-не чараш үези. Ынчангаш аңаа дыка ынак мен. Эштерим-биле даштыгаа хар-биле ойнаар. Бир катап угбам-биле «Тайга» станциязының дыка бедик даандан чуңгулап баткан бис. Дыка өөрүнчүг, солун болган.
- А чайын чүнү кылып турдуң?
- Чайын өг-бүлевис-биле аян-чорук кылып, Пермь, Новосибирск, Москва хоорайларга четтивис. Пермь хоорайны чарашсындым. Оон ыңай чайын тайга үнүп чордувус. Мен дыка хөй мөөгүлерни чыгдым, а акым одаг салыр будукчугаштарны чыып эккелген.
- Космонавт болур күзелдиг болгай сен? Чүге ону шилидиң?
- Чүге дизе космос-биле хамаарылгалыг шупту чүүлдерни дыка сонуургаар мен. Ай биле Марсче кажан-бир ужуп чедер боор мен.
Мира КОНГУЛ-ООЛ очулдурган.
Буян ООРЖАКТЫҢ чуруктары
