Тензин Успун — бичии бижикчи

Тензин Сарыглар – Кызыл хоорайның 16 дугаар школазының ийиги классчызы. Ол чечен чугааларны чо­гааткаш, бодунуң номун чырыкче үндүрер сорулгалыг. Оон аңгыда бичии бижикчи Тензин Успун деп псевдоним ат-биле номнарын үндүрер деп шиитпирлээн. «Сылдысчыгаш» солуннуң корреспондентизи бичии Тензин-биле чугаалашкан. - Бодуңнуң дугайында чугаалап көрем, школада кандыг эртемнерге ынак сен, Тензин? - Меңээ математика, англи дыл база куш-культура кичээлдери солун. Математика кичээлинде дыка хөй бодалгаларны бодап билир мен, ынчангаш солун. Англи дыл бөлгүмүнче авам мени киирип каан соонда, ол дылды сонуургай берген мен. Күш-культура кичээлинде хөй сула шимчээшкиннер кылып турар бис, оон аңгыда спортка черле ынак мен. Эштерим-биле бут бөмбүү ойнаарынга ынак бис. Школага эртенги шакта улуг класстарның өөреникчилери бөмбүктерни алгаш баар-даа болза, дөмей-ле ап четтигип турар бис. Бут бөмбүүнде ат-сураглыг вратарьлар Лев Яшин биле Джанлуиджи Буффонну сонуургаар мен. - Хостуг үеңде чүнү кылырынга ынак сен? - Хостуг үемде агаарлаар, дуңмам-биле ойнаар. Каратени база сонуургаар мен. Карате секциязынче 2 чыл улаштыр барып тур мен, сөөлгү үеде харын аллергия дээш үзүп турдум. - Бажыңга чүнү кылыр-дыр сен? Аваңга дузалажып тур сен бе? - Бажың иштин пылесостаар, шала ширбиир азы аяк чуур дээн ышкаш ажылдарны кылгаш, кудумчуже ойнап үнер мен. Оон бичии кыс дуңмамны база ойнадыр. - Өг-бүлеңни таныштырып көрем. Аваң-ачаң чүнү кылып турарларыл? - Ачам аэропортта ажылдап турар. Авам орус дыл болгаш литература башкызы турган, ам бичии дуңмам Дарянаны азырап олурар. Дуңмам чаа-ла 1 харлыг, Даряна төрүттүнүп кээрге, Кызылче көжүп келген бис. - Өзүп келгеш кым болуксаар-дыр сен? - Дегустатор болур мен. Аңгы-аңгы чурттарның аъш-чемин амзаар, шенээринге ынак мен. Ам дагаа чуургазын быжырып, манчыны хайындырып билир мен. - Чечен чугаалар бижип турарыңны билип алдывыс. Чүнүң дугайында бижип турарың ол, ном бижиир деп бодал канчап чедип келгенил? - «Радуга Дуга» деп номну даай -авам белекке берген. Ол ном орус, тыва дылдарда бижиттинген. Ону номчааш, ном бижиир деп бодал бажымга кирип келген. Оон бээр даай-авамга рассказтарымны чугаалап бээримге, видеога тырттырып алгаш, тыва дылче чара парлааш, бир дугаар номумну чырыкче үндүреринге дузалашкан. Номнуң даштын бодум кылыр дээш шенеп турдум. Бир рассказымда Аяс деп бичии оолдуң дугайында бижидим. Ол сүттеп чорупкаш, орукка аажок баксыраан эр кижиге дужа бээр. Оон билип кээрге, шагда-ла чиде берген ачазы болур. Рассказтарның темалары чүнү-даа кылбайн, чалгаарап олурган үемде бажымга кирип келир. Оон мен бижип эгелээр мен. Бир дугаар үнген номумну авам-ачамның кудазында белек кылдыр бердим. Олар аажок өөрээннер. Төрелдерим база өөрүп, мен дээш чоргаарланып турганнар. - Ынак номнарың азы киноларың бар бе? - Ооң мурнунда «Охотники за привидениями» деп кинону сонуургаар турдум, ооң соонда «Т-34» деп шеригжиткен кинону көрүп эгеледим. Ол кинону сонуургаан чылдагааным – ында тиилелге дугайында болгаш маады танк дугайында көргүзүп турар. Төрээн чуртувустуң төөгүзүнге чоргааралды оттуруп турар. Мен – чуртумнуң патриотчузу мен. Мира КОНГУЛ-ООЛ очулдурган. Сарыгларның хууда чуруктары