ТЕСЬ: ДЫКА ЭКИ ДЫШТАНДЫВЫС
Тываның аңгы-аңгы суурларындан болгаш Кызыл хоорайдан 30 оолдар, уруглар 21 хонук дургузунда кадыкшылга лагеринге дыштандывыс. Ол дээрге Красноярск крайның Тесь деп черде "Солнечный" деп дыштанылга төвү-дүр. Аңаа вожатыйывыс Екатерина Александровна бисти ававыс-биле дөмей башкарып турду.
Назы-харывыс аайы-биле өске-өске отрядтарга үскен. Хүннүң-не солун хемчеглер болуп, бисти өөредип, ойнадып, дыштандырып, агаарладып, киноладып, дискотекаладып турган.
Неделя санында кадыкшылывысты хынап, херек үеде эмнеп, хүнде беш катап чемгерер. Поварлар база дыка эки.
Лагерьниң чуруму езугаар телефонну чүгле хүнде ийи шак ажыглап болур. Ында чүгле Теле-2 бар, а бисте колдуу мегафон, МТС симкалары турган.
Лагерьге дыштанып тургаш, комнадымда уруглар-биле таныжып алгаш, ам Чадаанадан Оюмаа, Турандан Таня-биле доктаамал харылзажып тур мен.
Алимаа КҮЖҮГЕТ,
6 "а" класс.
Хайыракан суур
