Торга, Маас, Үзүт-Ховаган чурттап турган чүвең иргин
Чиңгир ногаан үнүш-сигенниг болгаш чечек-чимистиг шыргай арганың ортузунда сыра-ыяш коңгулунга үш алышкы: Торга, Маас, Үзүт-Ховаган чурттап турган чүвең иргин. Алышкылар бир-ле эртен амданныг чемин ижип-чип, аянныг чугаазын чугаалажып олурганнар. Ынчан улуг акызы Торга олургаш:
— Мен бөгүн эът сугар хааржак чазап эккээйн — деп-тир.
Ортуну Маас олургаш:
— Мен шары соп эккээйн — диген.
Хеймери Үзүт-Ховаган ора:
— Мен оттап эккээйн, акыларым, манаңар — дээш, Үзүт-Ховаган ужуп чорупкан.
Акылары дуңмазын манап чадааш, боттарының кылыр дээн ажылын кылыр дээш чорупкан. Оон эгелээш-ле алышкылар ужуражып чадашкан дээр чүве. Улуг акызы Торга эът сугар хааржак чазаар тааржыр ыяш дилеп, ыяш соктап, шинчилеп, арга-арыг кезип чоруп берген. Ортун дуңмазы Маас шарызын соп чадааш, оода ооң чүгле ханын соруп аар-дыр дээш сүрүп чоруп берген. Хеймер дуңмазы Үзүт-Ховаган ам-даа от эккеп шыдаваан, бажыңнарның сайгылгааннарын дескиндир ужуп, ажык от чалбыраажынга өрттени бер чазып, диленип чоруп берген чүве иргин.
Алышкылар демниг ажылдаар деп чүвени уттуп алган болгаш, күзел-сорулгазы-даа бүтпейн барган ужуру ол чүве-дир.
Таспан СААЯ.
Чурук Интернеттен
