Тыва биле Россия кады 80 чыл: Тываның болгаш ЛУР-нуң школачылары телекөвүрүг таварыштыр ужурашкан

Тываның школачылары биле ЛУР-нуң Свердловскының 6 дугаар школазының өөреникчилериниң ээлчеглиг телекөвүрүг таварыштыр ужуражылгазы эрткен. Ону ТАР-ның ССРЭ-ге каттышканындан бээр 80 чыл оюнга тураскааткан. Кызыл хоорайның 1 дугаар школазының оолдар, уруглары чылыг-чымчак байыр чедириишкинин белеткеп, өөрлеринге Тыва Арат Республиканың ССРЭ-ниң составынче 1944 чылдың октябрь 11-де эки тура-биле киргениниң төөгүзүн таныштырганнар. ЛУР-нуң школачылары база бистиң уругларывыска байырны чедиргеннер. Олар тыва чоннуң фашизмге удур демиселге киирген үлүг-хуузун чугаалааш, хүндүткелди болгаш четтиргенин илеретпишаан, юбилейлиг хүн-биле байырын дамчыткан. Телекөвүрүг таварыштыр ужуражылганы Кызыл хоорайның 1 дугаар школазының директорунуң кижизидилге талазы-биле чөвүлекчизи Наира Балян база 6 дугаар школаның директору Лидия Дьякова белеткээннер. Ужуражылганың түңнелинде ийи тала моон-даа соңгаар кады ажылдажылганы уламчылаарын дугурушканнар. #80летВхожденияТНРвСССР #ЛНР #НавигаторыДетстваТыва