Уруглар садынга ойнаар, а школага өөренир

Кызылдың М.А. Бухтуев аттыг 1 дугаар ортумак школазының 1 "д" кла­зының өөре­никчизи Диа­на Мааты-оол-биле чу­гаа­лаш­тым. – Диана, школага өөренириңге кандыг-дыр? – Ооң мурнунда уруглар сады барып турдум. Школага өөрениримге, уруглар сады барып турганынга бодаарга, арай-ла берге-дир. Хүндүс удувас. Онаалгалар хөй болур. Садикке колдуунда ойнаар, а школага ойнаар үе чок болур. – Башкыңның адын кым дээр ирги? – Мээң башкым дыка чараш. Ону Тереза Адар-оолов­на дээр. Өөренип эгелей бергеш, дыка эки деп бодаан мен. Чоорту эскереримге, дыка шыңгыы башкы чорду. Уруг­лар садынга дег, чассытпас-даа. Шыңгыы болурга, чогум эки ыйнаан. – Чаа эштериң база хөй бе? Аразында номчуп, бижип билир уруглар, оолдар бар-дыр бе? – Ийе, эштерим ам-даа кө­вүдээр боор. Чаа өөренип эгелээн болгаш, ам-даа чамдыызын билбес мен. Чоорту таныжып алыр бис. Үжүктерни таныыр, санап билир эштерим бар. Мен бодум база элээн хөй үжүктерни садикке тургаш-ла, өөренип алган мен. – Өөрениринден аңгыда, школага чүнү канчаар-дыр силер, Диана? – Бисти школага чемгерип турар. Авам меңээ: «Шоколад, чипсы орнунга каша, мүн, ийи дугаар дээн ышкаш изиг чемнер кадыкшылга ажыктыг, кызым. Изиг чемни ыяап чиир» — деп чагыыр кижи. Ынчангаш школага изиг чемни тавакка арттырбайн төндүр чип алыр мен. – Өзүп келгеш кым болур сен? – Модель болур күзелдиг мен. Ынчалза-даа дизайнер болурум-даа чадавас. Чүге дээрге чүнү-даа каастаарынга, чараштаарынга ынак мен. – Хостуг үеңде чүнү кы­лырынга ынак сен, Диана? – Чуруттунарынга, дааранырынга, ырлаарынга, танцылаарынга, эштииринге ынак мен. Дуңмаларым Давид, Дамир, Дарина-биле ойнаксаар мен. Чаагай чем кылыры база меңээ солун. Немелде өөредилге төвүнде ойнаар-кыстар даараар бөлгүмде барып эгеледим. Чурулга бөлгүмүнче база барып эгелээр боор мен. Авам, ачам-биле садыглар кезииринге база дыка ынак мен. – Чылдың кайы үезинге эң-не ынак сен? Күс азы чай дээн ышкаш. – Мээң сеткилимге кайызы-даа аянныг-дыр. Ынчалза-даа кыш меңээ эң-не эки Чуңгулаарынга ынак мен. А күс база чараш. Күскү сесерликке авам- ачам-биле селгүүстээрге, аян­ныг-ла. Айдың Ондар, чурукту Буян Ооржак тырттырган