Ынак авамга байырым чедирдим

Экии, "Сылдысчыгаш" Силерже бир дугаар чагаа бижидим. Кызылдың 9 дугаар школазының бирги классчызы мен. Эштерим-биле кады өөренирге, солун-дур. "Үжүглелимде" үжен алды үжүктү башкым Сайхана Дапытовнаның дузазы-биле саат чокка өөренип апкаш, адым бижип, номчуп турар апардым. Авам меңээ: "Эки номчуттун, эки өөренир сен" — дээш, "Сылдысчыгаш" солунун чагыттырып берди. Солунну үргүлчү номчуп тур мен, дыка солун-дур. Ынчангаш "Сылдысчыгаш" ынак солунум таварыштыр чырык черге мени чаяап каан авамга байыр чедирер деп бодап алдым. Мээң авамны Соян Орляна Орлановна дээр. Ол дээди экономист эртемниг. Ол — 3 чараш кыстарының ынак авазы. Ынак авамга Авам турда — чечектерниң каазын, Авам турда — чечектерниң чаражын. Арыг сугну ижеримге — тааланчыын, Арыг хепти кедеримге — чылыг-дыр. Аккыр шайны ижеримге — амданыын, Авам-биле агаарлаарга — солунун, Авайымның шырайының — чаражын! Авам чиик машиназын боду мунар. Бисти, угбамны, мени, садик назылыг дуңмамны эртенги шакта школага чедирер, а кичээлдер соон­да ап алыр. Ававыс дыка эрестиг, чараш, спортка ынак. Ынак ававыстан үлегер ап, өөренип, өзүп ор бис. Аюша СОЯН, 1-ги классчы. Кызылдың 9 дугаар гимназиязы.