Ырлаарынга салым-чаяанныг кыс
«Өг-бүле бүрүзүнде чаңгыстан эвээш эвес дээди эртемниг уруг» төлевилелдиң киржикчизи, Ай-Чурена Хурен-оол-биле таныжаалыңар, уруглар. Ай-Чурена 2006 чылда Кызыл хоорайга төрүттүнген, өг-бүлезиниң улуг уруу. - Ай-Чурена, "Сылдысчыгаш" уруглар солунунуң номчукчуларынга бодуңну таныштырып көөр сен бе? - Ээрбек ортумак школазының 10-гу классчызы мен. Найыр, Начын дээр бичии эр дуңмаларым бар. Авамны - Алиса, ачамның адын Белек дээр. Олар кайызы-даа спортка хандыкшылдыг. - Школага кандыг мөөрейлерге киржир-дир сен? - Спортчу оюннарга, ылаңгыя хол бөмбүүнге, хөлчок ынак мен. Маргылдаалар үспейн киржип, шыырак түңнелдерни эккеп турар бис. База республикада чылдың-на эртип турар уругларның «Хамнаарак» ыры мөөрейинге чедиишкинниг киржип турар мен. Эрткен 2020 чылда республика чергелиг «Хамнаарак-2020» мөөрейиниң Дээди шаңналынга төлептиг болдум. Ол меңээ улуг өөрүшкү болган. 2019 чылда кожуун чергелиг «Уруглар үнү» ыраажылар мөөрейинге база-ла Дээди шаңналды алган мен. Оон аңгыда, шыдыраага база сонуургалым улуг. - Тергиин-дир! Сээң деткикичилериң кымнарыл, Ай-Чурена? - Бирээде авам, ийиде клазывыстың башкызы Байлак Валерьевна Хурен-оол. Олар - мээң улуг дузалакчыларым. - Школага кижи бүрүзү черле ынак кичээлдиг болур болгай, сээң ынак кичээлиң чүл? - Күш-культура, орус дыл болгаш математика кичээлдеринге ынак мен. Башкыларымның тайылбыр кылыры база тода, билдингир. - Хостуг үеңде чүнү кылырынга ынак сен? - Гитарага ырлап өөренип турар мен. Дааранырынга болгаш авамга дузалажып, дуңмамны ап, бажың ажылдарын кылырынга ынак мен. - Келир үеде кым болуксаар сен? - Ыраажы-даа, дизайнер-даа болуксаар мен. Дизайнер кижи дээрге идик хепти бодунга таарыштыр, кымга-даа дөмейлешпес кылдыр даарап, чогаадып алыр. Ынчангаш күзелдерим чедип алырынга бодумга бүзүрээр мен. - Күзелдериң бүдүп, келир үеде Тывавыстың база бир чараш ыраажызы, улуг дизайнери болуруңну күзедим! Алдынай СААЯ.
